• 1
    Content text...
  • 2
    Content text...
  • 3
    Content text...
  • 4
    Content text...
  • 5
    Content text...

Hukum Siasat Gereja


  

RUHUT PARMAHANION DOHOT PAMINSANGON DIGEREJA KRISTEN LUTHER INDONESIA


A. Pangantusion Taringot Tu Ruhut Parmahanion Dohot Pamisangon

1. Patujolo :
Pinuji ma Debata Jahowa na tontong marmahani huriaNa sahat tu sadarion. Ibana do na mamillit jala manuru AnakNa Tuhan Jesus Kristus , Parmahan na denggan (Joh 10,11).
Ro do  Jesus tu portibi on gabe Parmahan, ditanda do ganup suara ni PinarmahanNa, Ibana do parmahan na denggan. Diseahon Ibana do hosaNa humonghop angka birubiruNa. Dijaga do hita sian ragam ni angka huaso na songon rumang ni babiat panoro na naeng mamolgak hita gabe sirang sian parmahan na denggan i.
Torop do dipabangkit Ibana angka naposoNa na gabe parmahan di tongatonga ni huria I, alai sai adong do na so haposan. Tuhan Jesus diboan do haluaon na gok pasupasu di angka na pinarmahanNa jala ditulak do angka parmahan na so haposan namamboan poda haliluon. Ibana do nampuna hita, dagingta dohot tondinta ro di sandok artanta. Ndang loasonNa hita mago molo tongtong taihuthon hataNa jala mian hita di Ibana.
Ala ni i margogo ma hita marpanindangion na mangolu maradophon angka huaso na adong diportibion , songon I nang maralohon angka debata sileban. Hot do pandohan ni Tuhan Jesus nang tu hita sahat ro di sadari on ma mandok : “Ditangihon angka birubiruKu do soarangKu jala Hutanda do nasida, diihuthon do Ahu. Gabe hulehon tu nasida hangoluan salelenglelengna, ndang be mago nasida salelenglelengna jala ndang tarrampas manang ise nasida sian tanganKu” (Johannes 10,27-28). Ala ni i do diparmahani jala dipinsang Ibana hita molo manimbil hita sian HataNa dohot dalanNa. Dilehon do patikNa tu hita na mamboan ngolu na gok pasupasu  asa tapangke i dibagasan holong maradophon dongan jolma. Ingkon badia do angka na porsea I, ala badia do Debata na manjou jolma I tu harajaonNa (3 Musa 19,2; Jesaya 6,3; Mateus 5,48; 1 Petrus 1,15-16).
Ala ni I ma ingkon sipasidingon ni na porsea I do dirina nang parsaoranna sian dosa dohot ulaon ni sibolis (1 Petrus 2,1-2). Tama di ingkon unduk hita manjalo parmahanion dohot paminsangon ni huria I, ai tarajumi do Debata sandiri na patupahon hita marhitehite Hata dohot PatikNa I, asa tau hita jongjong songon halak na niasianNa jala na pinarbadiaan ni mudar ni Jesus Kristus naung manobus hita gabe jolma na imbaru (2 Korintus 5,17), huhut patorashon haporseaonta so hasurahan paima ro Ibana paduahalihon (1 Tessalonik 5,23).
Asa ingkon rajuman do ia ulaon parmahanion dohot paminsangon na pinatupa ni huria I, songon ulaula dohot dalan ni Debata do I laho pauliulihon huriaNa di portibi on (Mateus 18,15-18; 1 Korintus 14,26).

2. Lapatan Ni Ruhut Parmahanion Dohot Paminsangon
Ia ruhut parmahanion dohot paminsangon I, I ma ruhut sidalanhonon laho marmahani dohot maminsang na maralo tu habadiaon ni huria. Ingkon badia do huria I di portibi on nasa na niula ni ruasNa unang gabe pargasipan  di huria i. Ai marhite ruhut parmahanion dohot paminsangon I togutoguon ma angka pardosa anggiat dipauba rohana gabe mangolu ibana muse (Hesekiel 33,11; 1 Korintus 5,5).
Asa ia sangkap ni ruhut parmahanion dohot paminsangon, I ma manogunogu dohot pauliulihon huria i. Dibahen I ganup halak na padalanhonsa naeng manghangoluhon holong niroha, unang ma songon panguhum sambaing ibana dirajumi, alai songon parmahan do tahe na mangaradoti tondi ro di ngolu ni na panarmahanna (Hesekiel 3,20; Mateus 16,19).
Hombar tusi adong 3 pangalaho ingoton ni Huria laho mandalanhon Ruhut Parmahanion dohot Paminsangon tu pangalaosi:
Manogunogu ruas ni huria asa marsihohot di holong ni Kristus Jesus.
Manjaga asa polin huhut unang rarat dosa I di tongatongana. Ai marhite sian pinsang-pinsang I naeng dipanghilalahon pardosa I rimas ni Debata paboa na so jadi pasombuon parjahat I mian di bagasan hajahatonna.
Marhite jamita, poda, tangiang dohot parmahanion do palumbahon halak na naeng mardosa asa dipasiding dosa I huhut dijamothon dirina.
Asa magopo do nasa paminsangon parhuriaon ia so nionjar ni holong ni roha nasida maminsang. Ai ndada na manorui umbahen dipinsang nasida, alai na mangurupi jala na mangajari do. Anggiat marhite paminsangon I gabe mangolu tondi nang parsaoranna.

3. Na Mandalanhon Ruhut Parmahanion Dohot Paminsangon
Huria do marmahani dohot na maminsang angka pangalaosi marhite angka parhalado ni huria niuluhon ni Pandita manang wakilna. Ndada holan Parhalado disi dirajumon na maminsang nasida alai tung sandok  huria ido. Dibahen i tama do saluhut nasida manjaga asa unang masa pangalaosion di huria. I do Alana ingkon saluhut do nasida patut palumbahon na naeng mardosa i.
Ndang sai tarbahen sandok huria i marpungu, sae ma holan angka na pinajolo ni huria i, i ma angka parhalado ni huria. Di rapot nasida ma dipamanat ia adong sitangkasan manang sipinsangon sian angka dongan na mangalaosi.
Ia ditotophon rapot i, i do putusna. Dung putus panimbangion taringot tu paminsangon sibahenon tu parsala, dipikiri rapot i ma dalan pasingotohon ibana huhut manangianghon ibana. Ai mambahen dipinsang ibana asa saut do malua sian pangalaosion manang dosana gabe mangolu muse. Naeng ma botoon ni parsala, sandok huria i do napatupahon paminsangon alai pambahenanna, ndang roharoha ni parhalado maminsang alai pambahenanna, ndang roharoha ni parhalado maminsang ibana. Ndang tagamon so unduk rohana jala mabiar huhut maila ibana molo dihilala sandok huria i do na maminsang ibana.
Ndang jadi ginjang roha ni na maminsang, alai naeng ma mardongan tangiang rapot i mandalanhon pinsang-pinsang tu pangalaosi i, ai rap jolma na gale do hita hinaliangan ni dosa. Holan ala asi ni roha ni Debata sambaing do na mangaramoti hita, umbahen so madabu hita tu dosa.

4. Na Hona Ruhut Parmahanion Dohot Paminsangon.
Sipinsangon ni huria i do angka pangalaosi, partohonan manang ruas ni huria i, i ma pangalaho na maralo tu Hata ni Debata na mangulahon dosa na patar manang na buni. Ia dosa na patar i ma nanaeng di paandar di bagian III,VI ni buku on. Alai maol do botoon taringot tu dosa na buni. Masuk tuson do angka hasalaan na manggagat songon burbur, gabe songon tasik ni bosi na maol longkangan, na pola tahe sai diampini halak hasalaan i. Mansai jorbut do panghorhon ni dosa na buni, pola dipertahanhon jala dihalomohon halak laho mangulahonsa ai gabe utang i dihilala rohana molo so diulahon hasalaan i. Sipata do angka halak si songon on martopenghon kebudayaan manang ekonomi laho mangulahonsa, ai sai adong do hagogoon na manait rohana, gabe lam madabu jala mago ma haporseaon dohot ngolu partondion dohot ngolu parhuriaonna. Debata do na manguhumi pangalaosion na buni.

 

5. Siingoton Ni Na Mandalanhon Ruhut Parmahanion Dohot Paminsangon.
Ia angka na mandalanhon ruhut parmahanion dohot paminsangon naeng ma mangalehon tingkina dohot rohana songon parmahan na pauliulihon tondi ni pangalaosi i unang ma songon panguhum.
Ndang sintong pardalan ni ruhut parmahanion dohot paminsangon ia pintor dihudus mandabu paminsangon so jolo ditopot jala ditangkasi hasalaan i (hurang hatorangan na tangkas/bukti). Unang ma dipaujung paminsangon i marhite na holan sahali marrapot alai naeng ma dua tolu hali. Molo maol dihatai unang tompu, ai dokdok do ulaon manguhumi.
Asa tangan so diputushon dope paminsangon i, naeng ma jolo tangkas dapot hatorangan pambahenan ni pangalaosi i ro di Alana umbahen dilaosi ibana patik ni Debata, jumolo ma begeon hatorangon i sian pangalaosi i sian pangalaosi i sandiri, ndang sian halak na asing.
Unang masindokdohi didalanhon paminsangon i, unang mamilamila manang marnida bohi laho padalanhonsa.
Unang ma dipangke manang diperalat ruhut parmahanion dohot paminsangon i laho pasombu tagas mamaloshon manang paduruhon dongan tarlumobi molo adong parsalisian dohot hamaolon ni huria i.
Ingkon dibagasan holong ni roha ma angka na mandalanhon ruhut parmahanion dohot paminsangon i.

6. Ruhut Ni Paminsangion.
Naeng ma mansai jamot patulushon paminsangon asa tongtong marsaringar tondi parmahanion nang panogunoguon i. Ndada naeng patubuhon hansit ni roha, baliksa asa dipatundalhon hasalaanna jala asa marsangap Debata siala hamubaon ni rohana.
Nang pe dos sude dosa, ndang adong dosa na metmet dohot nab alga, alai marningot tondi parmahanion dohot panogunoguon na adong di ruhut parmahanion dohot paminsangion nungga porlu adong metmet dohot balga ni paminsangon i. Deba dosa pangalaosion nunga tuk pinsangon holan marhite sipaingot di jolo ni parhalado, deba marrumang uhuman na adong hatontuanna (hukuman bersyarat), jala na umborat ndang tarjua so pabalion sian huria. Marhite i diondolhon disi tujuan manang fungsi ni parmahanion, pangajarion dohot panogunoguon ni ruhut paminsangon di huria i.

7. Siingoton Ni Huria Maradophon Na Hona Pinsang Tagan Di Bagasan Ruhut Paminsangon.
Tongtong  do dihobashon ni huria panghobasion parmahanion tu angka na hona pinsang, ai ndang lomo roha ni Debata mida hamatean ni parjahat (Hesekiel 33,11). Ndang jolma sapalsapal/ na so marguna, jala ndang songon musu nasida rajumon. Diingot Pandita, guru huria, sintua, evangelist, parjamita ina, diakones dohot natorop ma manangihonsa, ai ingkon ingoton umbahen dipinsang huria i ibana, anggiat mulak nian ibana sian haliluonna. Ala ni i sitopoton do ibana, sipaingoton nang pe jogal rohana. Ingkon naeng hilalaonna holong ni roha ni parmahan i di ibana, anggiat olo gabe dauk rohana.
Naeng do mulak parjahat i tinaluhon ni holong ni roha. Manang beha pe uhum  dihonahon tu parsala, jadi do ibana marminggu, siarahononhon do, anggiat unang ditadinghon parmingguon i. Ai beha ma ibana mulak ia so jolo ditangihon Hata ni Debata. Alai tutu dibalian ni huria do ibana rajumon (1 Korintus 5,11; 2 Tessalonik 3,6; Titus 3,10).
Naeng do panghilalaonon ni huria i asa ditanda ibana hahuranganna paboa na so haposan ibana, ndang sitangihononhon dope hatana di huria i. Saleleng adong dope ruas ni huria di bagasan paminsangon, songon utang ma i di nasa huria i. Ndang jadi nasida mansohot mangalului dalan manogunogu na lilu asa mulak tu hasintongan.
Taringot tu na hona ruhut parmahanion dohot paminsangion:
Naeng ma jolo adong boaboa
Molo parhalado do na mangalaosi i, naeng ma botoon ni Pandita Resort na masa i.

            Nasa ruhut parmahanion dohot paminsangion na pinadalan ni huria tu sahalak ruas ni huria, sisuraton do I tu notulen dohot tu buku parmahanion dohot paminsangon.

8. Panjanghonon Ni Huria Di Parsala Na Naeng Mulak
Rade do tongtong huria i manjanghon haroro ni parsala na naeng mulak i, ai marhite i lam moru ma utang ni na sahuria i maradophon parmahan na sumurung i, i ma Tuhan i. Parbue ni tangiang dohot ulaon ni huria i do na pinataridahon ni sangkap ni parsala i. Dapothonon ni parsala na naeng mulak i ma pangula ni huria laho manurathon pangidoanna i, asa adong siboanon tu rapot ni parhalado na niulahon ni Pandita manang wakilna. Dung denggan ditimbangi rapot pangidoannai i, paboaon ma i muse tu ibana asa rade ibana umbege hata ni tingting panjanghonon di bagasan parmingguon. Sihobasan ni guru huria dohot Pandita ma ulaon panjanghonon i di tongatonga ni huria di jolo ni Parmahan na sumurung i. Ai nunga saut be parsaoran na ginohan ni holong ni roha ni Debata na patut sihalashononhon songon ari na balga, ari pardamean di sandok huria i. Taringot tu panjanghonon di halak na matemate ne boi do janghonon mulak tu huria halak na hona pinsang naung matemate ne, molo ditangkasi Pandita hasintonganna. Jala na boi do pasahaton tu nasida ulaon na badia, songon I nang molo monding nasida, boi do antoan ni huria hombar tu panangkasion ni Pandita.
Taringot tu panjanghonon di parhalado ni huria molo hona ruhut parmahanion dohot paminsangon sasahalak partohonan di huria i, alai nunga dipauba rohana jala dijanghon huria i parsitutuon dohot hatauonnaboi do nasida sumuang manjalo dohot mangulahon tohonanna muse molo so pola mambahen gasip tu huria i.

 

B. PARTORDINGNA LAHO MANDALANHON RUHUT PARMAHANION DOHOT PAMINSANGON

1. Pangalaho Ni Parmahanion Dohot Paminsangon
Tangkas do diajari Tuhan Jesus siseanNa taringot tu parmahanion i, ai didok do di Johanes 21, 17 tu si Petrus: “Parmahani ma angka birubirungKu”, ja di Mateus 18,15-17 “ Molo ditangihon ho arahon ma donganmu sada manang dua asa hinatindanghon ni dua manang tolu halak nasa hata. Alai molo so ditangihon nang nasida, paboa ma tu nasa huria i. Molo so ditangihon nang huria i, etong ma ibana songon parbegu”.
Ala ni i, tagan so saut dope mardosa sasahalak, patut do mardalan parmahanion, asa unang masa nian bali manang haruar sian huria i. Ala marsibagai do panghorhon ni sala manang dosa i, naeng ma manat angka parhalado manimbangi asa unang masa uhum na borat tu parsala na ummetmet, hape numeang tu parsala na umbalga. Ai ragam do dosa i, adong ma i dosa na so tinuntun, dosa ala ni terpaksa, dosa ala ni na gintalan, dosa na tarsor, adong muse dosa naung sinangkapan hian, naung na tinuntun pe.
Anggo panghorhon ni dosa dohot pangalaosion i, manorusi do i sahat tu harohaon ni jolma (kejiwaan), parsaoran di masyarakat, songon i nang tu sundut na mangihut nang tu sude jolma pe.
Dilehon Tuhan Jesus do huaso tu angka siseanNa i  manesa dohot pahothon  dosa ni angka pardosa marguru tu angka dosana be (Mateus 16,18; 18; Johanes 20,23). Alai sijanghonon do mulak pardosa di huria i. Balga do asi ni roha ni Tuhan Yesus manjanghon angka pardosa na manolsoli rohana, alai laos balga do uhum nang rimas ni Debata dompak halak na jogal roha dohot pangansi.
Molo dihaburjuhon huria i maminsang angka pangalaosi, lam ias ma parsaoran i gabe denggan pangalahona, tau sitiopon ni angka na so tang dope haporseaonna. Badia ma huria i nang idaon ni angka parugamo na asing molo dipadao pangalaho ni angka parsalan i. Alai molo dipasombu do, ramun ma huria ni halak Kristen di roha ni angka parbegu nang parugamo na asing.
Asa na ringkot do uhum parhuriaon, ai pangajarion do i mangaramoti dongan huhut manonggoti parsala di hasalaanna dohot manogunogu nasida mulak tu Debata.
Sitogutoguon do ruas laho mananda hasalaanna manang dosana na buni manang dosa hasianna (dosa na so tartinggalhonsa). Hata ni Debata do na boi maminsang dohot manogunogu ibana asa margogo manadinghon dosa i, so pola ala pinadapot ni ruhut parmahanion dohot paminsangon. Boi do hita so dapot ni aturan ni jolma, alai patar do ianggo di jolo ni Debata.
Hinorhon ni i naeng ma ganup hita mangoloi Debata asa unang manghorhon mara di tondinta, di ngolunta, di keluarga nang di parsaoran masyarakat, ai taboto do ndang hagabusan hita Debata.

2. Tangga-Tangga Siingoton  Laho Mandalanhon Ruhut Parmahanion Dohot Paminsangon
Taringot tu metmet dohot balga ni pangalaosion: adong do dipaingot, adong do na dischorsing, adong do nang di pecat. Mangihuthon buku na Badia i, adong do 5 tangga siingoton ni huria laho mandalanhon ruhut parmahanion dohot paminsangon:
Panogunoguon/ Panorangion tu Huria:
Porlu do bahenonta panorangion di pangantusion ni lapatan dohot tujuan ni ruhut parmahanion dohot paminsangon. Asa molo madabu uhum, unang dirajumi ruas i songon paksaan dohot uhuman sambing, alai tanggung jawab ni sandok ruas do mangargahon dohot padalanhon ruhut parmahanion dohot paminsangon i. Ingkon dihila ganup ruas ni huria do, ia ruhut parmahanion dohot paminsangon i dalan ni huria do i mangaramoti, marmahani, papitahon huria i dohot manogunogu ganup halak tu ngolu na Kristen marojahan tu Hata ni Debata (2 Timoteus 3,5; Kolose 3,16-17).
Denggan do sude ruas ni huria mangantusi jala umboto parmahanion dohot paminsangon i marhite boaboa, ai naeng ganup nasida rade manjalo ruhut na mangonai tu nasida manghorhon tu hamubaon ni roha. Naeng do ganup ruas ni huria umboto jala mangantusi lapatan ni patik ni Debata lumobi pangajarion di angka na naeng manghatindanghon haporseaon.
Ai tung so denggan do madabu pinsangpinsang tu sada ruasni huria hape na so diboto do na sala pambahenanna i.
Ala ni i, patut do:
Togutoguon do ruas ni huria i tu habuluson mulaulaon (2 Tessalonik 3,12) jala unang diula ulaon na maralo tu Hata ni Debata.
Togutoguon do ruas ni huria asa nasa pambahenanna bahen hasangapon dohot pujipujian tu Debata, isarana marhite tumpakna, peleanna, guguanna tu huria dohot parsaoranna tu masyarakat na humaliangsa. Angka ulaon si songon  i do umbahen angurhakristenon gabe tartogu ganup halak laho pasangap Debata (I Korintus 10,31; Roma 14,18).
Nang parhalado ni huria pe patut do togutoguon umboto aturaan ni huria, Konfessi nang ruhut parmahanion dohot paminsangon ni huria asa unang adong na sala padalanhon.

3. Sijahahononhon
Sijagahononhon do angka pingkiran dohot sangkap na paholang hita sian Debata dohot sian Hata ni Debata i, angka na naeng manirang hita sian huria dohot angka roha na manegai/ mangalo dos ni roha (rapot) ni huria i. Molo adong pangalaho na masa di masyarakat umum na maralo tu patik dohot haporseaon  ni huria manang hagogoon na naeng manuruk tu tongatonga ni huria, issarana hamajuon saonari marhite hasipelebeguon na modern, na mamboan pelean parsantabian (sesajen), mambahen parsaoran/ panghataion dohot angka na monding, ulaon pesta adat na nirajuman pangalapan tua na so mardomu tu parbue ni haporseaon, hamoraon dohot hagabeon dohot hasangapon tu diri na so marojahan tu Hata ni Debata, songon i nang na mambahen Almanak gabe parhalaan, pengguguran kandungan dengan sengaja, kumpul kebo, korupsi dohot angka na suman tusi (Efesus 5,11). Sisosohononghon do tu natoras ni dakdanak na paasingkolahon ianakhonna tu parsingkolaan ni parugamo na asing asa dijamothon nasida sikola i unang gabe lipe (muba) haporseaonna.

4. Sipasingothononhon
Di mat 18,15-17 torang do didok Tuhan Jesus tu angka Siseanna asa tangkas dipaingot jala diajari halak na marsala I marhite na mananopot sahali ro di dua hali asa unang di torushon dalanna na salai. Asa dang manigor padalanon paminsangon tu halak I so jolo ditopot.
Tagan so saut dope mardosa na naeng mardosa I, molo binege baritana tinopot ma ibana jala pinodaan. Godang do halak na olo manangihon lumba-lumba gabe dang saut nasida mardosa.
Molo manigor madabu uhum tu sada halak so jolo pinalumba ibana, sala do huria I disi jala di hasangohon debata do sisongoni. Molo so ditangihon soara ni na palumba ibana, jinou ma ibana tu jolo ni pandita asa di paingot. Molo dang ditangihon be, di arahon pandita I ma duanari donganna pasingothon  ibana. Molo tung jogal rohana manulak hata sipaingot I, niarahon ma ibana tu jolo ni rapot parhalado asa disi pinaboa tu ibana uhum na tama. Ia manigor unduk roha na manopoti hasalaanna jala ditundalhon hata sipaingot tu ibana di jolo ni rapot I, I nama hasaeanna.

5. Paminsangon  (Masa Ujian, Pencobaan, Schors)
Andorang so pinadalan I sipatupaon ma:
Sipaingothon do na marsala I dua ro di tolu hali paboahon hasalaanna.
Boanon ma ibana tu rapot parhalado na ni uluhon ni pandita Ressort manang  wakilna .
Tingtinghononhon ma I di huria.
Siramothononhon do di rapot parhalado, so tung maposihu uhum I gabe mandele ibana manang manenghu gabe langgus rohana. Alani I ingkon jamot do panimbangion i. molo so tarpaujung be, di boan ma hatai tu rapot/sinode Ressort.
E. pabalion parsala sian huria  
Ia uhum tu na so olo tu madinghon pangalaosionna I manang dosana, I ma sipabalion sian huria manang sadia leleng. Lapatanna: dang taruli be ibana di angka arta ni debata, dang jadi marulaon na badia. Molo satahi amanta I dohot inantai di hasalaan I, dang dongan Kristen be nasida rajumon, dang tardidi dakdanakna , dang lehonon surat-surat hatorangan tu nasida. Ndang haposan, dang dohot ibana marsoara di parpunguan halak Kristen, ndang jaloon guguan huria sian ibana.
Dohonon ni pandita I ma tu ibana, na so tarbahen sesa dosana, molo so dipauba ibana dohot pangalahona. Sitingtinghononhon do di gereja nasa si pabalion (partononan/ruas, bahen lumba-lumba tu huria I sunggul-sunggul , anggiat unang masa be pangalaho si songon i. ndang jadi dandoon parsala I songon luhut harajaon, unang dirimpu halak tarsesa dosa bahenon ni hepeng.
Ndang pola sipaluaon giring-giring laho pabalihon pardosai songon tu na mate. Ala nungga di soadahon halak on be hakristenonna di hata nang di ulaon, nang di pambahenanna jala dang parduli di pinsang-pinsang etongon ma halak on songon parbegu, pabalion ma nasida sian huria.

6. Napadalanhon Ruhut Parmahanion Dohot Paminsangon
Molo ruas do namarsala i., rapot parhalado do mambahen paminsangoni                      tinolopan ni pandita.
Molo partohonan do na marsalai, rapot ni donganna satohonan do mambahen paminsangon.
Tu sintua, donganna sintua na sahuria I do manimbangi ni uluhon ni pandita.
Tu diakones, donganna diakones na manimbanginsa ni uluhon pandita.
Tu guru huria, angka donganna sa-ressort ni uluhon ni pandita resort do mambuat haputusan.
Tu pandita ina (bibelvrov), donganna bibelvrouw ni uluhon ni preases do mambuat haputusan.
Tu evangelist, donganna evanggelit ma manimbangi ni uluhon ni pucuk pimpinan.
Tu partohonan pandita songon ma:
Hasalaan na mardomu tu administrasi, pucuk pimpinan na mandalanhon paminsangon i. Molo hasalaan na mardomu tu tohonanna do, rapot pandita na niuluhon ni pucuk pimpinan manimbangsa.
Molo na mardomu tu poda haporseaon do, rapot pandita hadomuon manimbangi dohot padalanhon paminsangon

7. Rumang Paminsangion Na Maralo Tu Patik Ni Debata

Marhite panandaonta di patikni debata di bagasan buku na badia I dohot konfessi ni huriatta lam nalnal do idaonta angka rumang-rumang ni dosa si pasidingon (paheba 1 Musa 20 ; 5 Musa 4 ; Mat. 5-7).

8. Mangonai Tu Patik Parjolo Dohot Paduahon (Pangoloion Tu Debata)

Mambahen bukti tu hauma (nalele boras pati ni hauma/keramatna), manjujur ari, mangupa tondi, pasingothon rasian ni tanganna tu datu, manungkun parsorion tu ahli mujum, umpeop ulos/homitan, umpeop piso manang hujur ni begu, mangondaonda I,manahui tua sian na mate, porsea di tona ni natuatuana na maralo tu hata ni debata. Martonga-tonga di tingkimarrapot, marhajinjang paulak jual tu jabu tingki matean, pa purpur sapata di partonding di halak na punu (naso mardakdanak baoa) manang na mate (so sanga sohot) dohot tortor na marlaok (hasipelebeguon).
Na manortori, namanulangi manang manganapurani holi-holi na niongkal, namangalap tondi ni na marsahit (di tingki tarsonggot tinggal ninna tondina di ingananna i), na mardebata idup, na marsomba tu tunggal panaluan dohot pohung,begu, na palaho parsili dohot si paimbar, na mansaem (mambahen saem asa intap ni i), na pauli parpagaran, na marsanti na marmanuk di ampang (namanungkun di dia nuaeng masa tu ngoluna), patupa partahanan ni daging (alemu), madabu aji, na mandohoti ulaon hasipelebeguon, na mangapus hoda , na marbonang manalu, na mamiahi hoda, marmiak manuk, na mangalahat horbo, na marojahan tu haporseaon tu hasipelebeguon, mangallang babi mangambat, babi panungkol, pamispison dohot angka na suman tusi. Suang songon I gabe ruas ni partai manang aliran ni sisoadahon debata.
Na marsomba tu mulajadi nabolon, debata asi-asi , debata bataraguru , marsomba tu soripada , debata managala bulan,I ma hamanurat di ugamo hasipelebeguon.
Na mardebata arta (isara ni mammonisme, materialisme, konsumerisme, kapitalis songon I nang angka rumang ni “parbinotoan” na marojahan tu hasipelebeguon, nang rationalism, fanatisme, na maralo tu hata ni Debata. 

9. Mangonai Tu Patik Patoluhon (Manggoari Debata)
I ma na mamurai manang margapgap manang manolonnolon manang marujarujaran na roa marhite goar ni Debata. Songon i na mansoadahon ugamo di tongatonga ni parugamo na asing. Jala ingkon tangkas do hita martangiang di bagasan goar ni Tuhanta Jesus Kristus ulu ni huria.

9. Mangonai Tu Patik Paopathon (Pabadiahon Ari Minggu)
I ma na losok marminggu, mangula manang papinjamhon artana pola sundat marminggu, na paloashon bidat/ parpoda haliluon na marjamita di jabuna dihimbau ma asa unang adong. Mangadati di ari Minggu, na manggaori parmingguon, mangulahon ulaon sakramen na Pandita, na paloashon, bidat marjamita di huria. Na so manggarar guguan na tama di huria, na so olo padidihon anakhonna, na so marsuru dakdanakna tu parguruan  laho manghatindanghon haporseaon, na mansoadahon ugamona di jolo ni halak na manginsahi parminggu dohot na marulaon na Badia. Songon i nang partohonan na sala i, sitimbangon ni rapot parhalado do i.

10. Mangonai tu Patik Palimahon (Pasangaphon Natoras)
Angka na so pasangaphon natoras, I ma na pahatahatahon manang manishasnihasi natorasna, mangogai natorasna so mardongan pangoloion, na mambahen parkaro manang parsalisian tu jolo ni na so porsea, isara ni parba.
Na mamurai natorasna, na mangonai tangan tu natorasna, na palaolahon natorasna. Ndang olo marmudumuduhon ala naung matua, na mangarampas ugasan ni inana panoroi.

11. Na Mangonai Tu Patik Paonomhon (Pamunuon)
Ima na mangarsahi donganna manang mambahen tihasna mamungkuli donganna jolma, Parmabuk/ sisobur tuak/ alcohol, sigadis narkotika, morfin dohot ganja, pasiaksiakhon na tinompa (pinahan nang angka binatang).
Na mamusa donganna, na manggadami, mangardomi, mandormai donganna, paborhathon pangulubalong dohot --------- donganna tu ulaon sisongon i nang angka na maniop rasun. Na maningkot dohot abortus (pengguguran kandungan).

12. Mangonai tu Patik Papituhon (Pangalangkupon).
Marroharoha (sangkap na roa) tu halak na asing.
Na tois marabit, na gere/gemor manghuling, parhata baraksi, na girgir manonton film porno (disungguli hagiot ni daging).
Na mangabing, na paabinghonsa, germo dohot boruboru sibabijalang (WTS), na marlangka pilit, na marsiduadua, na palaohon jolmana, na mahilolong ro di angka na mangurupi di ulaon jahat i. Songon i muse homosex (parmahanion ni baoa tu baoa) dohot lesbian (parmainanon ni boruboru tu boruboru), hahisapon dohot nasa hailaon (Roma 1,24-27).

13. Mangonai Tu Patik Paualuhon (Panangkoon).
I ma na mamogo tongosan, pardasing na mangansi, pangemor, pencopet, na matorbanghu pabungahon hepengna, ijon, silansumhon boniaga (diganis na so boniagana), manangko, terpidana, korupsi.
Na somal manangko, manjalo na tinangko, mangomo hepeng ni halak na satahi dohot panangko, mangangati, pandoboon, podang, pambongkar, pamangus (panangko), sitangko suansuanan.
Penyanderaan/ penculikan.

14. Mangonai Tu Patik Pasiahon (Sitindangi Gabus).
I ma na marhata tundal dohot manghatindanghon na so tutu di jolma, papeolhon uhum, manolon na so tutu, na mambahen surat (surat kaleng).

15. Mangonai tu Patik Pasampuluhon (Panghaliangion ni roha di arta dohot jolma)
I ma na mamolamola naposo ni dongan na marmitmit/ marmihimmihim.
Manghaliangi ugasan ni dongan lumobi ugasan na metmet, na pogos manang na mabalu, mamolamola dongan saripe ni dongan, mangalehon pokok tu parjuji manang manjabuisa, na parorot tuhe ni parbalohan dohot talutuk. Pangalaosion na gabe gasip di huria ingkon tangkas do timbangon ni Rapot Parhalado, ai asingasing be do roha ni pangalaosi i. Tupa do nasa pangalaosion i ala ni tois ni rohana, alai adong do i ala tarsaor ibana. Ingkon sasoara parhalado maminsang angka parjahat sisongon i, unang rarat hajahaton i. Ramun do barita ni hakristenon molo dipaula so diida huria I dosa na masa.

 

C. ANGKA RUMANG NI PANGUNJUNAN NA BOI PAHOLANG NGOLU SIAN HA-KRISTENON

1. Parbagason
Dung ditompa jolma i didok ibana ma: “ndang jadi punjung jolma i. Hubahen ma di ibana sada pangurupina bahen donganna” (1 Musa 2,18). Angkup ni i didok Tuhan Jesus do di Mateus 5,23 “Ganup na palahohon na niolina, ia so ala ni na marmainan, na palangkuphonsa do. Pangalangkup do nang na mambuat na sirang i”. Antong na pinadomu ni Debata, ndang jadi sirangon ni jolma. Hombar tu ruhut habadiaon dohot partanggungjawaban di parsaripeon ni hita halak Kristen, diaturhon hurianta ma:
Molo naeng mamungka pardongansaripeon, ingkon jolo tuk do umur ni baoa i 25 (dua puluh lima) taon, jala boruboru i 20 (dua puluh) taon. Hombar do i tu na niaturhon ni pamarenta Republik Indonesia di Undang-undang Perkawinan. Molo asing sian hatontuan i isara ni umur, tingki, panolopion ni natoras dohot pangalaho na asing, holan Pandita Resort i do na boi mangalehon dispensasi i.         
Sipatupaon do parmahanion, patoranghon lapatan dohot  tanggung jawab di parsaripeon ni halak Kristen tu pangolin dohot oroanna Andorang so tingki pamasumasuon parbogason i.
Ndang hatolopan parsaripeon di ruhut ha-Kristenon:
Ni sada halak baoa tu inana panoroni songon I ama tu boru na sinoroanna.
Sahalak baoa dohot ibotona, nang dohot boru ni namboruna tangkas, nang na mariboto sian inang na marpariban tangkas.
Ndang  tartolopan huria molo naeng marhamulian/ kawin sada doli-doli tu sahalak ina naung sirang sian keluargana, molo so mangoli baoa manang so muli parompuan i.
Dung dipatupa partumpolon di huria ingkon jolo ditingtinghon do dua hali ari Minggu, ipe asa manjalo pasupasu parbagason.
Molo keadaan memaksa isarana ala ni angka ulaon/ parkarejoan manang cuti, boi do sahali tingting, dung jolo ditangkasi Vorganger dohot Pandita. Jala tingki pamasumasuon pinomat 4 ari dung jolo tingting.
Nang pamasumasuon di tingki ari Minggu ingkon sian panolopion ni pandita Ressort do i, ala naung tangkas dipamanat nasida sialana.
Pandita do na pasahathon pamasumasuon tu na marbagas di geraja. Ianggo catatan Sipil urusan pamarenta do i, alai ingkon paingothonon ni huria do so tung tarlalap na naeng marbagas i ndang pasurathon parsaripeon nasida tu Catatan Sipil.
Molo adong baoa manang boruboru naeng pahothon parsaripeonna, hape ndang manghatindanghon haporseaon  dope ingkon jolo manghatindanghon haporseaon ibana asa martumpol dohot dipasupasu. Alai molo na ro sian huria Rom Katolik molo naung manjalo Ekaristi/ Krisma  ndang pola paluaon (Manghatindanghon Hoporseaon be) suang songon i sian huria Kharismatik manang Pentakosta molo naung tardidi magodang ndang pola be paluaon/ manghatindanghon haporseaon.
Ndang tarpatupa pamasumasuon di gereja tu na maiturun/ mangalua.
Sipabalion do halak parsiduadua. Anggo ina na tinindi dohot tubuna hot do parhuriaonna molo so panolopi disangkap ni ama i laho marsiduadua. Molo muli panindi i tu halak na asing manang mate, jala holan sasada nioli na tinindi i nama, boi ma jaloon marguru manopoti.
Ingkon jolo marujung do parguruan ni halak na manopoti sala jala dijangkon mulak asa boi antoan ni huria i nasida songon ruas na tama. Molo adong pangalaho na so tinagam/ mendadak, isara parsahiton, une ma dihatai parhalado do i asa boi ditontuhon pangantoion ni huria tu nasida.
Ndang haoloan ni huria mangantoi parbagason ni sahalak ama na mabalu ia so jolo salpu onom bulan dung monding hinabaluhonna. Suang songo n i nang tu ina na mabalu 6 bulan ma tu nasida. Alai molo na adong do dakdanak na tading di lampin manang marumur di toru ni 2 taon, pandita resort do na boi mangalehon panimbangion, alai partoru ma dung salpu 3 bulan.
Sipinsangon do parsaripeon roharoha, na digoari kumpul kebo, semen level nang na ginoaran kawin kontrak.
Sitingtinghononhon do na so etongon be ruas ni huria halak na marsaripe di balian ni huria, na marsaripe holan marhite Catatan Sipil, manang ala parugamo na asing pe hamuliaonna, manang naniolina umbahen diulahon songon i (ida 1 Korintus 7, 12-13+38). Alai tarjalo do nasida mulak tu huria dung jolo ditolopi rapot parhalado jala dung marguru manopoti.
Sipinsangon do pardongan parsaripeon na holan manjalo pasupasu raja. Jala huria ingkon jeli marmahani dohot melayani asa masuk muse gabe ruas ni huria dung jolo manopoti sala.
Tarpatupa do pandidion tu anak na niain dung adong keputusan sian pengadilan negeri  siala anak na niain i.
Boi do pasahathon pandidion na badia tu tubu ni pandidi, dung sidung mandohoti parguruan manghatindanghon haporseaon.
Boi do pasahathon pasupasu parsaripeon molo masihaholongan anak dohot boru ni huria i manang boru dohot anak na ro sian na asing, molo olo parugamo na asing i gabe Kristen marhitehite na manjalo pandidion na badia. Alai ingkon tandatangananna do parjanjian paboa na rade ibana manorushon parguruanna, dung sidung pamasumasuon i.
Sitiroan sitogutoguon, siramothononhon jala sipinsangon ni huria do homosex dohot lesbian.

2. Ari Parsorang Ni Dakdanak Dohot Pandidion
Siparmahanon ni parhalado do asa unang masa ruhut ni hasipelebeguon di tingki parsorang ni dadanak. Unang ma masa pamolati, pagar, salaon, manjujur purba, pangulpuhon, pangarundingon di partopap ni posoposo dohot rumang ni juji uju manganggapi.
Intap ni na boi ingkon sahatophatopna do pasahathon dakdanak i tu Debata marhitehite pandidion na badia. Ndang jadi pestapesta manang ulaon adat manundatisa.
Hona uhum huria do na marsaripe, molo sorang anak nasida baoa ditoru ni 9 bulan, jala boruboru ditoru ni 8 bulan dung manjalo pasupasu parbagason. Asing ma molo adong surat hatorangan sian dokter (prematur).

3. Parguru Manghatindanghon Haporseaon
Ingkon tangkas do panghobasion ni parhalado ni huria di parguru na naeng manghatindanghon haporseaon. Ingkon tangkas mengantusi hata na tarsurat di Padan na Robi dohot di Padan na Imbaru nang Katekismus pe.

4. Ditingki Ni Na Matean
Naeng ma tangkas parmahanion ni parhalado ni huria I manogunogu jolma tu pangkirimon di haheheon ni angka na mate, ala hamomonang ni Kristus i ganup adong na matean. Tapasunggulhon ma nang lapatan ni parningotan di angka na monding:
Ganup jolma do ingkon mate.
Di banuaginjang do sambulon ni tondinta.
Holan Haporseaon na tangkas do na tau tu pangkirimon i.
Nungga talu hamatean marhitehite haheheon ni Kristus Jesus Tuhanta i.
Asa on ma siingoton uju mate:

5. Na so jadi:
Patupaon juhut/ purpur sapata di parmonding ni sahalak na so maranak na so marboru manang parmonding ni anak sasada na so sanga marhasohotan.
Mambahen sira tu batang na mate dohot mangalangka manuruk Bangke na mate i. Ai nunga ditaluhon Tuhanta hamatean marhitehite haheheonNa.
Mangagendai na mate maningkot,ia so ala ni sahit jiwa manang ala na solpoton. Siapulan do sisolhot ni na monding i.

6. Na jadi:
Jadi do boanon tu gereja angka pangula dohot ruas na burju Marminggu dung ditolopi pandita Resort pangidoan ni keluargana.

7. Sitiruon:
Sitiruon do ruas ni huria na matean asa unang masa be disi nasa ruhut ni hasipeleguon, songon na tama di angka naung dihamonanghon ni Kristus.
Sitiruon do ruas ni huria di tingki na paias kuburan, asa tongtong ingot na marojahan do hamateanna tu hamatean dohot haheheon ni Kristus naung manaluhon hamatean ni jolma.

8. Ala ni i unang be disi:
Na martonatona
Na marsuap, asing na molo holan laho paiashon ilu.
Na mamboan sipanganonhasoloan ni na mate i tagan di ngoluna i.
Asa sitiruon do molo adong na pamasa sijagaron, sanggul marata uju monding natuatua. Unang masa disi ulaon hasipelebeguon.
Sitiruon do unang sai diharingkothon ruas ni huria na pajongjong tugu, ala dang denggan panghorhorna tu ngolu haporseaon, tu ngolu ni ekonomi, tu ngolu ni parsaoran siala toal. Tumagon ma tapauli tugu na mangolu isara pajongjong parsikolaan, gereja, ulaon masiurupan (koperasi) dohot na mardomu tusi.

9. Mangongkal holi
Haoloan do mangongkal holi molo ala ni:
Kuburan na nieak ni dalan manang aek Magodang, tanah longsor, parhutaan, pembangunan industry.
Na pasadahon kuburan ale mate di luat nadao (luat sideban).

Naeng ma parbinoto parhalado ni huria molo masa namangongkal holi, laos songoni na manimpan holoholi i paima dipamasuk tuingananna, alai molo dao ingananna ikkon tu Gareja disimpan. Molo ulaon sadari jalo ma sian kuburan na leleng dipamasuk tu kuburan na imbaru. Ndang sipatupaon be maragenda disi. Ndang jadi tortorhonon saringsaring ni na monding i jala unang ma didiringi gondang manang musik laho pamasukhon  holiholi i tu inganan na imbaru.

10. Gondang
Ndang hatolopan hurianta gondang ditingki namatean, mangongkal holi molo masa disi ulaon hasipelebeguon. Jala molo masa ulaon hasipelebeguon disi, mardalan ma Ruhut paminsangion.

D. PANGALAHO SIALOON DOHOT SIPASIDINGON

1. Juji
Ia juji ima meam-meam na mangalalapi dohot pasuda hepeng dohot tingki, namanegai hasadaon dohot harohaon  ni rumah tangga nang dohot ulaon. Sipasingoton do nasa na mangulahon juji, suang songoni na manjabuisa. Alai molo so tarpasingot be pinsangon ma. Ai tusegana do Haporseaon ala ni juji. Hinaroa ni parjujion, ima nasai holan mangalului pangomoan, alai mate ma harohaon dohot panghilalaan namarsihaholongan. Siluluan do pangomoan na tingkos marhite Haporseaon sian ulaonta (Luk 19,1-7), ingkon adong do roha na marpanarihon di dongan jolma (1 Korintus 12,14-16).

2. Parmabuk dohot Parganja
Sipinsangon jala sipasingoton do parmabuk dohot parganja narkotik, morfin dohot angka na mardomu tusi, sisosoan do natorasna nang keluarga laho marmahani dohot paubathonsa. Ai manghorhon mara nabalga do molo masa parmabukon dohot parganjaon (1 Timoteus3,3; Poda 31,4-6). Jala manegai hahipason ni pamatang.

3. Maradophon Parugamo Na Asing Dohot Huria Na Mamulik Dohot Bidat
Siradotan ni huria do manjaga kerukunan antar umat beragama, maradophon parugamo na asing di bagasan negaranta na berdasarkan Pancasila. Dipatandahon i do huhut na adong jaminan kebebasan beragama dohot jaminan keamanan di negaranta.
Ndang jadi lapathononhon hata “kerukunan umat beragama” tu pangantusion na “dos do sude ugamo i”. ai tong do marsihohot hita dihaporseaonta, holan dibagasan Jesus jala marhite Ibana haluaon, hasintongan, dohot hatutuon (Ul.Ap 4,12; 1 Kor 3,11; Joh 14,6).
Sisingoton do hajongjonganta di angka upacara Nasional, paboa na halak Kristen do hita, na tontong marsihohot di bagasan pangoloion tu Kristus Raja ni angka raja jala Tuhan di angka tuan (Om 13,1-7; 1 Tim 2,2; Ul.Ap 5, 29; Pangk 19,16). Asa dinamartangiang hita i ma tangiang ni sada ruas ni Huria di sada Negara namangakui ugamo Kristen songon sada ugamo na niangkuan Negara Pancasila. Jala ingkon tangkas do hitaa martangiang dibagasan goar ni Tuhan Jesus Kristus ulu ni Huria i.
Sitingtinghononhon do naso ruas be ianakhon ni huria na “kawin kontrak” dohot na holan “kawin Catatan sipil” dohot boru manang anak sian parugamo na asing, ala dang mangantoi huria di parbabagasonna i (1 Kor 7,12-13+39).
Ala holan mangondolhon sebagian poda na dapot di Bibel I do angka bidat. Sipinsangon do ruas ni huria na laho mangihuthon bidat i. Ala ni i do dang diangkui GKLI hajongjongan ni bidat di ngolu haporseaon.

 

E. HATA PANIMPULI

Naeng ma tontong mangolu di huria i roha namarmahani, na tangkas di pamodaion tu hadaulaton, jala tangkas paminsangon tu naso olo tu hangoluan; asa unang adong manang ise namago ala soada sipaingot jala unang  marsapata nasida tu huria i.
Dipabangkit Debata do di Huria angka parmahan, ndada nagabe manguhumi nasida songon na nidokni Debata di Hesekiel 33,7-9:”ia ho ale anak ni jolma nunga hupabangkit ho bahen parjaga di pinompar di Israel, ia adong hata nanggo sada dibege ho sian pamanganHu, ingkon sipasingothononmu do i tunasida sian Ahu”. Molo Ahu mandok tu halak parjahat ingkon mate doho ale parjahat hape ndang marboaboa ho palumba halak parjahat I tumundalhon dalanna i nian matae do parjahat i dibagasan hajahatonna, alai anggo mudarna sian tanganmu do tungguonHu. Alai anggo dipalumba ho do halak parjahat I tu mundalhon dalanna i nian, asa mulak sian i nian, hape  ndang olo ibana mulak tumadinghon dalanna i mate dibagasan hajatonna ma ibana, alai anggo ho malua do hosam di baen ho.
Didok Tuhan Jesus dope di Mateus 16,19 :“Hulehon pe tuho anakhinsu ni harajaon banua ginjang i. Nasa na niihotanmu di tano on natarihot ma i di banua ginjang jala nasa pinalua mi ditanoon malua ma i nang di banua ginjang”.
Jala di Johannes 20,22b-23 didok Tuhan Jesus “jalo hamu ma Tondi Porbadia :molo disesa hamu dosa ni manang ise naung sesa ma i , molo dipahot hamu dosa ni manang ise hot do i”.